Meaning ofSee meaning davaa.ii in English, Hindi & Urdu

دوائی یہاں چھوٹی ی یائے نسبتی نہیں ہے، مزید علیہ ہے۔ اس لفظ کو بمعنی’’دوا‘‘، دلی اور پنجاب اور کہیں کہیں پورب میں بولتے ہیں۔ اسے ان دیار کا علاقائی لفظ سمجھنا چاہئے۔ لیکن دلچسپ بات یہ ہے کہ اگرچہ عام اردو والے اب ’’دوائی‘‘ نہیں بولتے، لیکن فارسی میں یہ موجود ہے۔ مندرجہ ذیل شعر’’بہار عجم‘‘ میں علی خراسانی کے نام سے، اور ’’آنند راج‘‘ میں امیر خسرو کے نام سے درج ہے ؎ غمزۂ شوخت جراحت می کند ہرکرا لعلت دوائی می کند کلیات خسرو میں ایک غزل اس زمین و بحر میں ہے تو، لیکن یہ شعر نہیں، لہٰذا اغلب ہے کہ شعر علی خراسانی کا ہو۔ خان آرزو نے’’چراغ ہدایت‘‘ میں لکھا ہے کہ ’’دوائی‘‘ متاخرین کا تصرف ہے۔ اس سے بھی گمان گذرتا ہے کہ محولہ بالا شعر علی خراسانی کا ہو گا۔ حسب ذیل شعراشرف ماژندرانی کا ہے ؎ بادہ درخم کہنہ چوں گردد دوائی می شود دختر رز پیر چوں شد مومیائی می شود دلچسپ بات یہ ہے کہ خود ’’مومیائی‘‘ میں یائے زائدہ ہے، اصل لفظ ’’مومیا‘‘ ہے، بعنی’’وہ مرہم جس کو لگانے سے ٹوٹی ہوئی ہڈی فوراً جڑجاتی ہے‘‘۔

ماخذ: لغات روز مرہ    
مصنف: شمس الرحمن فاروقی