Meaning ofSee meaning sar honaa in English, Hindi & Urdu

سر ہونا غالب کا مشہور شعر ہے ؎ آہ کو چاہئے اک عمر اثر ہونے تک کون جیتا ہے تری زلف کے سر ہونے تک مصرع ثانی میں محاورہ ’’سر ہونا‘‘ نظم ہوا ہے اور شارحین کو اس کے معنی بیان کرنے میں پریشانی ہوئی ہے۔ مولانا حامد حسن قادری نے لکھا ہے کہ ’’زلف کا سر ہونا کوئی محاورہ نہیں ہے‘‘۔ نظم طباطبائی نے’’سرہونا‘‘ سے’’سمجھ لینا‘‘ مراد لے کر ’’زلف‘‘ کو اس کا فاعل قرار دیا ہے۔ حقیقت یہ ہے کہ غالب نے دراصل یہ محاورہ تاش اور گنجفہ کے عالم سے لیا ہے جہاں بازی کا ’’سر ہونا‘‘ بمعنی’’بازی کا جیت لیا جانا‘‘ مستعمل ہے۔’’میرا یہ ہاتھ سر ہوگیا‘‘، بمعنی’’میں نے یہ ہاتھ جیت لیا‘‘، وغیرہ کے علاوہ ترپ کے پتے کو ’’ترپ سر‘‘ بھی اسی لئے کہتے ہیں کہ ترپ کے رنگ کا پتہ بقیہ رنگوں کے پتوں کو جیتتا یا ’’سرکرتا‘‘ ہے۔ تاش کی اصطلاح میں’’سر ہونا‘‘ بمعنی ’’فتح مند ہونا‘‘ بھی ہے۔’’یہ پتہ سرہے‘‘، یعنی ’’یہ پتہ جیت گیا‘‘۔ لہٰذا غالب کے مصرعے میں ’’زلف کا سر ہونا‘‘ بمعنی’’زلف کا ہاتھ آجانا، زلف پر قابو پاجانا‘‘ ہے۔

ماخذ: لغات روز مرہ    
مصنف: شمس الرحمن فاروقی