Meaning ofSee meaning nasabii-'aziiz in English, Hindi & Urdu

نسبی عزیز جب دو شخصوں کے درمیا ن کوئی پیدائشی رشتہ داری ہو تو وہ ایک دوسرے کے نسبی عزیزیا نسبی رشتہ دار کہلاتے ہیں۔ مثلاًعم زاد بھائی بہن، خالہ زاد بھائی بہن، یا اس سے بھی دور کی قرابت رکھنے والے آپس میں نسبی عزیز کہلائیں گے اگر ان کی قرابت کی وجہ پیدائش ہو، شادی نہ ہو۔ مثلاً میاں بیوی ایک دوسرے کے نسبی عزیز نہ ہوں گے، بشرطیکہ ان میں نسبی عزیز داری شادی کے پہلے ہی سے نہ ہو (مثلاً عم زاد بھائی بہن کی آپس میں شادی ہوجائے تو ان میں شادی کی رشتہ داری کے علاوہ نسبی رشتہ داری بھی ہوگی۔)ایسی عزیزداری جو شادی کے سبب سے قائم ہو، ’’سببی‘‘ عزیز داری کہلاتی ہے۔ مثلاًغالب اور خاندان لوہارو میں سببی عزیز داری تھی، یعنی امراؤ بیگم سے جب غالب کی شادی ہوئی تو وہ خاندان لوہارو کے عزیز دار ٹھہرے، پہلے ان میں کوئی رشتہ نہ تھا۔ لیکن خاندان لوہارو کی اولاد ہونے کے سبب لوہارو خاندان سے ضیاء الدین خاں نیر کی عزیز داری نسبی تھی۔ نسبی عزیزداری براہ راست ہوتی ہے اور سببی عزیزداری ’’نسبتی‘‘ ہوتی ہے۔ اسی لئے بیوی کے بھائی کو ’’برادر نسبتی‘‘ یا ’’برادر نسبت‘‘ کہتے ہیں۔

ماخذ: لغات روز مرہ    
مصنف: شمس الرحمن فاروقی