हिन्दी, इंग्लिश और उर्दू में ला'ल के अर्थदेखिए

لعل بمعنی ’’یاقوت، مانک، لال‘‘ اردوفارسی اور عربی میں ہے۔ ’’پیارا، بیٹا‘‘ کے معنی میں صرف اردو ہے۔ بعض ( مثلاًً ’’آنند راج‘‘) کا قول ہے کہ ’’لعل‘‘ معرب ہے’’لال‘‘ کا۔ بعض (مثلاً’’جہانگیری‘‘) کا کہنا ہے کہ’’لعل‘‘ فارسی ہے، اور چونکہ یہ پتھر سرخ ہوتا ہے، اس لئے اسے’’لال‘‘ بھی کہتے ہیں۔ بعض لوگوں کا خیال ہے کہ ہندوستانی ناموں کے ساتھ ’’لعل‘‘ نہیں لکھنا چاہئے، کیوں کہ وہ لفظ عربی ہے۔ یہاں اول با ت تو یہ ہے کہ نام سے زیادہ ذاتی کوئی چیز نہیں، اور ہر شخص کو اپنے نام کا املا اور تلفظ خود طے کرنے کا حق ہے۔ کنھیا لعل کپور اور ہیرا لعل چوپڑہ ’’لعل‘‘ لکھتے تھے اور رام لال دونوں طرح لکھتے تھے، یعنی’’لال‘‘ بھی، اور’’لعل‘‘ بھی۔ دوسری بات یہ ہے کہ اگر’’لعل‘‘ عربی ہے (جو مشکوک بات ہے) تو’’لال‘‘ بھی فارسی ہے، لہٰذا وہ بھی ہندوستانی نام کے طور پر غیرملکی ہوگا۔ تو اب جن بے شمار لوگوں کے نام میں’’لال‘‘ یا ’’لعل‘‘ تھا، یا ہے، وہ اپنا نام تو بدلنے سے رہے۔ جو اپنا نام جس طرح لکھتا ہے، یا جو جس طرح رائج ہے وہی صحیح ہے۔ ’’جواہر لعل‘‘ اور’’جواہرلال‘‘ دونوں صحیح ہیں، لیکن جہاں تک معلوم ہے، پنڈت موتی لعل نہرو اپنا اور جواہر لعل نہرو کا نام ’’لعل‘‘ ہی کے ساتھ لکھتے تھے۔ تیسری بات یہ کہ ہمارے یہاں ا س طرح کے مخلوط ناموں کی کمی نہیں: جوہری مل، راج بہادر، رام غلام، ،صورت داس، وغیرہ۔ لہٰذا ہندوستانی ناموں میں’’لعل‘‘ لکھنا بالکل درست ہے، بشرطیکہ صاحب نام بھی یوں ہی لکھتا ہو۔ دیکھئے،’’لال‘‘۔

ماخذ: لغات روز مرہ    
مصنف: شمس الرحمن فاروقی